Mazviita Gumbo,
Maita zvenyu Madyirapazhe,
Shava huru yakapamba Gona,
Gara ramasango, chipauro chamafuta,
Godzamuto, mhuru inobva Gona,
Vezheve tsvuku, veRufura,
Mushukuru weGona,
Vane chitanga chisizari n’ombe,
Chinotozara musi wezvita.
Maita vari Masakandya, maita vari Njaidza;
Vari mhiri kwaNyazvidzi, vari Hwiru,
Vari Raubwi, vari Muhari huru,
Vari chikomo chaMabwazhe, Chisema, Sambiri;
Chikara wapazhe, Chifambanamana;
Chifuramakuru, mazondo tinodya,
Maita vari Svikire, vari Maturi, vari Chivende;
Vari Hubvumwe, Chiputsamakuru Godzamuto;
Shava yangu yiyi, Chitanga, Chikanyamatope.
Maita vari Mapfukudza
Kunodyiwa boora nechirimo;
Vari Chikakatanwa, vari Boromoka, vari Mandira.
Ganyamatope, hekanhi Madyirapazhe,
Kuti vane zhara vaponewo,
Hekanhi Musipa,
Mareranherera, Matsikapasi kuzorora kuvata,
Hekanhi Gutu, hekanhi weGona, ndisengei,
Senganhundwa, Sengamusoro pane romo neziso.
Hekani Mhandamakan’a, Matakuradumbu,
Matangakumwa muviri une nyota,
Matsikapachena napane rima,
Vatambi vomuganyiro.
Maita Mukuvapasi,
Chitivamasvisva,
Chinemukutu,
Chirambamuriwo,
Chidonhamwongo,
Chifuramakuru,
Bumazvirema, hekanhi Masengedzwa,
Teveratsimba mutsvairo wezhira.
Hekanhi Murendo, Mushayachirashwa,
Mafuta tinozora, runyanga igonan’ombe,
Gumbo mubhadha, dovo tinowadza.
Nyama tinodya, mukaka tinomwa,
Muswe inhawo, ndove inodzura mumba,
Zvaitwa Chitova, mushukuru weGonan’ombe,
Aiwa zvaitwa Gumbo,
Chinemukutu, maKorekore.