Maita WaMambo,
Maita Nungu yangu yiyi,
Maita Chipiri mukuwasha waMambo,
Hekani Maposa,
Chirashamihwa,
Maita Ngara yangu yiyi,
Masvingo aGovere,
Maita Chikandamina,
Weshanu uri pauta,
Maita vari Chirungurira,
Manjekechera, vari Gokomere,
Madyaumire okwaZimuto,
Chizuza changu chichi,
Vakuru vehondo,
Maita Nungu, Hananda, Zimbovora,
Mazviita vaRusvingo naMazambara,
Vakapfura dombo nomuseve rikabuda ropa,
VaMupumbuvoko pachirimo,
Rave zhiza vofura shangwa,
Vakadziidzisa vanhu kutunge timbwa,
Vokutora mapadza avanhu,
Vachindoise mugomo,
Vachibata wanike yangova mihwa yogo,
Zvaitwa WaMambo,
Vari mumangwandwi,
Ndwo magandanga,
Maita Ngara yangu yiyi,
Varidzi vehosho,
Manhanga ari muzunde,
Maita Zinjenjema,
Vavheneki vepane hosi,
WaMambo wesango,
Vakuwasha waMambo,
Nungu yangu yiyi,
Mushayachirashwa,
Minungu ndeyenagara,
Nyama usavi hwavamwe,
Dehwe richiseveswazve,
Maita vari Govere, Masvingo angu,
Zimwaya, Zimuto wangu yuyu.